街頭巷尾 熱血滋味青年屯

隨大型商場及連鎖店相繼落成，近幾年屯門可謂大變天，市中心更時刻迫得水洩不通。遠離煩囂鬧市約十分鐘腳程，卻是悠閒舊區虹橋，亦是屯門熱血年輕人創業之地。在街頭巷尾，有九十後開設的茶餐廳與Cafe，以行動追逐夢想，用美食換取掌聲。

位於巷尾的Cafe Heato，是屯門市內少有的精品咖啡店，提供各式咖啡、蛋糕及意粉，店外有幾個座位，一派寫意盎然。兩位老闆Amen及David同為二十五歲，要請他們停下來拍照做訪問實有點困難，只因二人與Cafe的廚師Sam、蛋糕師Ivy等人關係融洽，不時會七嘴八舌地討論新製咖啡及蛋糕，熱鬧得停不下來。這家Cafe之所以開得成，是因為剛從澳洲Working Holiday回港的Amen有日重遇舊同學David，又知道他愛沖咖啡，於是便提議試試開店，「我哋一齊係屯門讀書，咁又住同一座大廈、同一年出世，唔爭在開埋同一間舖。不過我哋性格好唔同，我鍾意講嘢，佢就鍾意做嘢。」Amen笑說。

開業初期兩人凡事親力親為，調製醬汁煮餐沖咖啡一腳踢，試過一日做16個鐘，返到屋企仲要去後樓梯開會，經營八個月後現已上軌道，星期六、日更是排長龍，回想以前情況較混亂，曾有客人說「仲有咩淨低唔該拎畀我」，依家的確鬆一口氣。店員清一色是年輕人，工作氣氛愉快，有客人笑稱他們一Team人好似漫畫《One Piece海賊王》，一起熱血追尋夢想。Amen還說：「其實真係好好彩，我哋不斷有好多人加入，依家有廚師、炒豆師、蛋糕師，又有人幫我哋睇住盤數，加上業主超好人肯簽長約，我哋諗住可以係隔籬開多間，教下人沖咖啡，客人又可以慢慢食唔使排咁耐隊囉。」


延續老店情懷

另一邊廂在街頭開設茶餐廳和士多的老闆KK，同為二十出頭的小伙子。幾個月前大膽向打算退休的快餐店店主提出「頂手」要求，其中一個目的是繼承餐廳的美味奶茶，「我就係呢度樓上住，經常落嚟開餐，雖然以前呢度獨沽一味得餐蛋麵食，不過我好鍾意飲佢杯奶茶，一聽到老闆話唔做就唔捨得。」於是乎KK以實際行動接手經營。

新香快餐店雖非大有來頭，但也算是老店，於1963年開業，1982年搬到現址虹橋至今。KK為保留老店風味，除沿用本來的招牌及裝潢，陳年舊物如鑽石牌電鐘、維他奶古董櫃亦保存下來，更搜羅多件舊物，為店內增加懷舊氣息。「以前我係中環返工做食肆，依家變咗係樓下開舖，慳翻時間可以同屋企人、朋友見多D，同埋最緊要呢頭熟，有份街坊人情味。」KK更謂多謝巷尾的Cafe Heato兩位老闆不時鼓勵及支持，否則自己一個未必撐得住，「初初自己搞餐廳有人潑冷水，附近有間壽司店仲話我間士多茶餐廳老餅一定執，依家佢間舖唔見咗，而我仲做緊。」