名人：陳欽杰永不言敗打造時裝王國

老闆陳欽杰（Boby）與太太徐巧嬌聯手創立的時裝品牌Moiselle，憑着獨特設計、選料上乘，成功在香港佔一重要席位，品牌快將成立廿年，回顧過去，期間經歷過不少風波。二人97年創業即遇金融風暴，籌備上市時又遇上美國911事件，重重難關，如何克服？夫妻倆除細說成功之道，更會大家如何維繫一個融洽快樂的家庭。

周年晚會主題夠創意

陳欽杰與太太徐巧嬌十分合拍，無論家庭或事業上，均是令人羨慕的一對。二人原來同是玩得之人，每年公司的周年晚會，均會設立不同的主題，實行與員工打成一片，齊齊為配合主題「扮嘢」一番。

周年晚會除了試過以「愛麗絲夢遊仙境」為主題外，亦試過「惡搞」電影海報，例如將「史密夫決戰史密妻」變成「華麗夫鬥華麗妻」、「我老婆唔夠秤」變成「我老公太生性」，可謂創意十足。

成功靠堅持

陳欽杰身為市價約四億港元上市公司的老闆，被問到成功秘訣時，他說：「我諗我哋市場觸覺比較靈敏，敢於嘗試，諗到啲新嘢就去試，同埋盡量把握機會，謙卑咁去學習。我哋亦永不言敗，無論成功與否都會好開心。當你堅持去做一件事情，就算當中有時唔順利，但只要堅持，不斷反思錯咗喺邊，同埋唔要求一定有回報，有呢個心態已經可以。」

「人棄我取」

問到自覺邊個時機掌握得好？陳生透露1997年前他們是做出口生意，但到了97年時，他們覺得是時候建立自己的事業。問到當時環境創業風險不少，為何還要嘗試？他說：「我哋本身有宗教信仰，所以畀咗我哋希望、盼望同信心，亦不斷去試。96年時發覺香港做出口呢個行業好難做，成本上漲，利潤唔係想像中咁多，好難做落去，所以開始計劃做自己品牌，我同太太都比較拗氣啲，啲人覺得難嘅就更加想做好佢，當時市場上覺得時裝係夕陽工業，我覺得未必係，雖說係夕陽工業，但點樣去扭轉佢呢？當我哋決定去做嗰時，就要扭轉我哋嘅模式，加啲創意同包裝，先有生存嘅空間，啱啱當時又有金融風暴，好多人都叫我哋打定輸數，但我哋好有鬥心，相信如果我哋盡力去做應該成件事出嚟唔係咁差，當時人棄我取，當有人退出呢個市場，我哋去做，喺嗰時好快霸佔咗個市場，開拓新業務。」

面對逆境總有出路

逆境時突圍而出，陳氏夫婦成功在市場打響名堂，被問到有否遇到困難低潮的時候，Boby說：「每個時間都會有，最深刻係911時，嗰段時間我哋諗住上市，籌備功夫已做咗一半，安排晒財務睇過盤數，如火如荼去搞上市計劃，點知突然發生911事件，好多基金都停咗，當時覺得市場上有幾差仲未知道，變咗大家都暫停，嗰個真係一個打擊，因為搞上市規例條數上只可以keep半年，所以要喺有限時間內完成計劃，911 hold咗個幾月，市場開始活躍番，我哋繼續進行，記得嗰時二月底之前一定要完成上市，我哋就成為當年農曆年前最後一間成功掛牌上市嘅公司。（當時點樣完成上市？）我哋冇放棄過，要堅持同有信心，又有班好好嘅搞上市團隊，包銷商嗰方面都好努力朝住個目標盡量去做，有啲人都叫我哋遲啲先上市，我哋覺得既然定咗時間就盡量去做。」

不做第一只做唯一

談到現在經濟不景氣，又應如何管理，Boby說:「依家主要控制成本，資金唔好留守喺公司，發掘多啲機會，唔好忘記我哋喺市場上邊方面最強，唔係一定要做第一，諗吓有咩係唯一，兩者揀一樣，你就可以喺呢個空間度生存。發展上要保持自己DNA，香港好少品牌走我哋呢個路線，要保持呢個風格，唔會因市道而改風格，但可以多元化啲，將品牌向橫發展多啲，強化自己品牌形象，內部開源節流，唔好畀成本上漲，等待機會發展。（咩嘢係你哋嘅唯一？）獨突性，我哋嘅設計、製造同藝術息息相關，咁藝術係無價，每件衫設計上都放咗好多心機，選料方面同香港其他牌子唔同，國際性多啲，唔係咁casual，一直有一定支持者。（向橫發展呢？）咁依家會開拓男裝、家品、運動服飾，依家啲人好追求健康，放好多心機喺呢方面，擴闊同鞏固自己品牌。」

「透過食物分享愛」

事業上陳生陳太拍住上，每日工作都很忙碌，家庭方面亦兼顧得很好，不單止融洽，三名仔女亦難得都願意幫手打理公司。問到如何維繫家庭？陳太說：「我覺得要有愛。屋企一直有規條，由細到大都定咗逢星期六、日都要同屋企人食飯，依家佢哋大個咗都會呢兩日同我哋食飯，如果有約會預先講，建立家庭關係好重要，係一個好嘅溝通渠道，愛可以透過行動去表達。好似老公鍾意煮嘢食，透過呢方面去傳達愛，佢平時周圍搵嘢食，試到好食又會去試做，我哋好幸福可以食好嘢，中國人成日講同枱食飯，乜事情都可解決，我哋各人每日都好忙碌，一到星期六、日，大家就一齊返教會同食飯，之後晚上佢哋就自由，去到幾夜都得，但節日假期佢哋都會返嚟陪我哋，係唔錯嘅關係，透過食物分享愛，唔係只係WhatsApp講，坐喺度慢慢傾，講吓佢哋有咩興趣，想發展啲咩，都可以講。」

陳太又謂與仔女相處如朋友般，問到陳生是否嚴父，有錯就鬧？陳生說：「我都好少鬧，都係多溝通，同佢哋分析畀意見，我有時會問番佢哋意見，我哋方法可能舊，年輕人睇到好多新事物，有時佢哋睇到啲成功個案，都會分析番畀爹哋聽，大家討論。」

一家五口各司其職

三個仔女都肯在公司幫手十分難得，陳生陳太亦直言會因應他們的能力分配工作，陳生說：「大仔做策劃比較多，佢比較有策略，好有遠見。二仔Harris就好有創意，溝通能力好高，有領導能力，可以帶領團隊，畀到同事工作嘅喜樂，環境開心，先會做得開心，佢能夠做到呢點。而三女Tiffany好有市場觸覺，好有Heart做嘢，有衝勁，凡事親力親為，每樣事情都去摸索。」

唔敢催仔女成家

陳生陳太又謂希望三個仔女快點成家立室，陳太說：「以前會催，依家唔敢，尊重佢哋，唔畀壓力佢哋，希望佢哋真係搵個錫佢哋嘅人，唔係真係咁急，我同先生當然想，但未必你想要就要。」仔女各有所長，問到會否退休後交棒給他們打理生意，陳太說：「曾經有諗過，只係諗咗一吓啫，我哋唔會退休，因為每日都有好多新事物，如果退休，真係好難同世界一齊再行落去，我哋想傳承我哋公司理念同文化，應該咁講，到時我諗會做幕後英雄，鼓勵佢哋，如果佢哋想，隨時都可以交盤生意畀佢哋，我哋又發覺佢哋鍾意同我哋一齊打拼，同埋大家有商有量，家族生意有佢哋好處，如佢哋有新idea，大家可以傾，點樣令件事順利啲，大家去互補不足，成功率自然高啲。」