開舖王開竅一步一步來

吳鴻圖是「開舖王」，他開北京拉麵店，後來又開飯糰連鎖店，接着賣健康麵包，最新的是開設餐廳，全部都將五顏六色的健康飲食以不同形式演繹，愈做愈有性格。但在成功背後，並非風平浪靜，他曾因發展太急，難以管理，以致部分業務亂七八糟。久經挫折，他出盡力改革，親撰營運手冊，極速重整旗鼓，更自我警惕不急進，決意要把健康食品循序漸進傳遍世界。

 吳鴻圖（Tony）是新移民的奮鬥故事。他十多歲從內地來港，自問不是讀書材料，眼見父母收入微薄，決定打工。黃毛小子能做甚麼？他說：「好多理想㗎，警察、醫生……但知識水平唔夠，諗勻晒衣食住行，發現做廚係最適合。」

他自小跟父母學得幾味京川菜，順理成章選擇連鎖京川食店學師。八年後，他以二十三歲之齡，與大師傅爭奪月薪兩、三萬元的行政總廚職位，爆大冷勝出：「要贏人就要畀心思，我早兩個鐘去將材料『挑花』，評判認為菜式賣相配合餐廳中高檔路線就揀我！」出奇制勝，令他在行內嶄露頭角。幾年後他卻抽身而出，決心創業，十六年後的今日，他開設四大健康飲食業務，憶述成功背後，悲喜交集。

開店首日亂到要拉閘

創業頭炮是他拿手的京川菜，他說：「我諗我有能力搵更多嘅錢，就同人夾份開舖，摒棄京川菜的肥膩，主張少油少肥！」這名小子甫開店，首天就要拉閘關門，說起來猶有餘悸。「諗住星期日多客人就急住開張，點知樓面、廚房好亂，啲單錯晒，臨時決定免費試食，兩萬蚊生意就咁送出去！」

嚴格整頓管理層後，舖頭四個月後便賺錢，更開設高達七間分店，但問題來了，Tony說：「有人埋怨分店質素參差，我決定將幾間分店結業，寫營運手冊做好管理，同埋利用中央廚房把關，預先烹調再運到分店，統一食品質素！」拉麵生意蒸蒸日上，Tony決意在港首創以飯糰為主打的「QQ RICE」飯糰店，他說：「以往香港有好多粢飯，但好易食滯，我哋以紫米、糙米等去整飯糰，以高纖維、少炸低糖為賣點，反過來幫助消化，好受歡迎，旺到一個月可以開三、四間分店，高峰期總共有二十幾間！」

分店太多管理追唔上

然而分店太多，管理卻跟不上，經過認真檢討後，他忍痛結束部分分店，放慢發展步伐，「抖定條氣先再發展！市場幾時都有，只係睇你準備好未。」「一步一步來」是Tony做生意的座右銘，「我做飯糰會先洗米，再將紫米、糙米、五穀米浸多一段時間，營養會溶入水，我想環保，所以開健康麵包店《39℃ Bakery》，用米漿做麵包、蛋糕，OL好鍾意！」去年底他再下一城，開設以健康飲食為主打的西龍纖味紙藝餐廳，連內地都有四間分店。

吳鴻圖Tony小檔案

年　　齡：43歲

現　　職：西龍（飲食）集團董事總經理

婚　　姻：已婚，育有一子一女

旗下食肆：西龍纖味紙藝主題餐廳、西龍傳香飯糰（QQ RICE）、39℃ Bakery、北京拉麵店。