行山日落線！經倚天脊行走飛鵝山賞夕陽！

      上過飛鵝山幾次，全因日落美景太吸引。爬上飛鵝山有多條路線選擇，最方便可揸車由飛鵝山道上觀景台，不過就同行山無關呢。如果要上飛鵝山發射站，直升機停機坪，都可以由飛鵝山道，東面有一條長長梯級可直達。另外仲多條路線由扎山道上，不過大部份都好崎嶇，其中仲有幾條係高危路線添。所以今次由倚天脊上，呢條路線相比下無咁危險，不過其中一兩段路都比較崎嶇，需要手腳並用。大家要做足準備，量力而為呀。

      首先由彩虹站上扎山道進入倚天脊入口，跟絲帶引路直上，途中有一兩大石羣可打打卡，到達飛鵝山發射站，附近仲有一個直升機停機坪，又係打卡熱點。

▲飛鵝山直升機停機坪是打卡熱點。

     打完卡沿西北方向山徑直走，先經過一大片竹葉林，經過肥豬石，到達象山山頂，再落山坡，又再走上東山山頂，又再落山坡，上上落落之後，終於到達觀景台。呢度係觀看日落最佳位置，可以鳥瞰整個東九龍。 睇完日落之後可以沿飛鵝山道西行， 直落到去沙田坳道，完成今次旅程。

▲飛鵝山肥豬石。

▲從象山回望飛鵝山。 

注意事項:

1/ 部份路段比較崎嶇，需手腳並用攀爬，請量力而為。

2/ 先下載行山地圖Apps，避免迷路。

3/ 路線比較長，帶備充足糧水，建議由經驗人士帶領。

4/ 愛護郊野清潔人人有責，自己垃圾自己帶走。

▲日落美景令人陶醉。

▲東山山脊。

飛鵝山

路線: 彩虹站>扎山道>倚天脊>飛鵝山>象山>東山>沙田坳道>黄大仙站

全程14公里 需時約4.5小時