東涌嘆完個靚早餐之後,坐大嶼山巴士34號入石門甲(留意班次比較疏落),廿多分鐘就到達石門甲總站,落車正式起步, 沿馬路直上入地塘仔郊遊徑,又名法門古道,行咗無耐,靠右手面有絲帶引路,横降落小叢林進入漕溪石澗,上游仲有多間寺廟,住宅,農地除咗有幾個大潭需要在山澗兩旁山徑繞過之外,其餘大部份都可從大石上面走過,可能呢條石澗比較小人行,所以絲帶標記都比較小。
不過漕溪無支流,所以一直攀上就係,同埋比較短,只有1公里多啲就行完,出澗後繼續接返法門古道上,左右兩旁有好多間大大小小嘅寺廟,好快就到達東山法門,其實係一道玄關,呢度同時係昂坪奇趣徑,又係彌勒山入口,繼續一直行,就到達昂坪廣場,經過大佛,沿石仔埗街一直行,去香港少林武術文化中心,靠左邊有條山徑行上去虎山觀景台。呢條山徑附近有幾個墓穴,條路巳鋪上大石磚,好易行,好快就到達,首先見到係四條中華白海豚大型雕塑,顏色漂亮,維肖維妙,的確係呢度嘅靚靚地標, 四條海豚後面有一條小隱徑,沿小徑走,初段近海岸有絲帶引路,可以下降落海邊,不過呢段斜坡泥路好鬆散,石頭又鬆脫,需要拉住左右樹藤緩緩下降,落到海邊係一個比較斜嘅石灘,可以欣賞倒美麗海邊,都值得一遊。
好辛苦爬返上嚟,經過四條海豚返去虎山觀景台,呢度條路左右兩邊欄杆,塗上紅色好鮮艷,沿山脊而建,遠睇好似一條小長城,氣勢磅礡,好壯觀,不愧為打卡熱點。行到尾段小涼亭,仲有一望遠鏡,可以窺探一下港珠澳大橋添。响呢度欣賞日落真係一流。
打完卡後可以沿路折返,或者繼續向前面小山徑走,不過呢段路比較斜,碎石鬆泥,要慢慢跣住落,旁邊有繩可以拉住落,呢段路風景開掦,可以欣賞象山和獅山,左面仲有港珠澳大橋,配合海灣,不失為一個大景,好似一幅油畫。跣咗十五分鐘左右落到地面,靠右邊就是寶珠潭,不時有大小魚隻跳上水面,睇完魚仔跳之後穿過村莊返回大澳巴士總站完成旅程。
路線: 石門甲>漕溪>法門古道>東山法門>昂坪廣埸 共5公里/大澳>虎山觀景台>寳珠潭大澳 共3公里
交通: 東涌乘坐34號巴士到達石門甲,昂坪乘坐21號巴士入大澳
注意事項 |
- 如果沒有行澗經驗可全程改行法門古道直接抵達昂坪; |
- 探索將軍石可由大澳文物酒店綑邊到達(注意有一定危險性); |
- 愛護郊野清潔人人有責,自己垃圾自己帶走。 |