什麼是好員工？什麼是好老闆？(二)

你公司有無啲講嘢好直接嘅員工？

經常講嘢令你好難頂，覺得佢好似挑戰你？簡直同你過唔去！

圖片由筆者提供

哈哈，以前嘅我，真係會希望呢啲人快啲走，或者我唔想對住呢種人。

今日嘅年輕人，敢怒敢言。如果出黎做嘢有返咁上下嘅年資，會覺得90後嘅說話好難聽得入耳，甚至認為溝通唔到。但係我地公司，大部分都係90後，有時候呢啲難聽嘅說話未必因爲佢地想針對我，只係佢地有不一樣的見解，所以會直接提出。

因為服務性行業好難請人，員工都知道自己好吃香。喺咁嘅大環境下，點樣可以令到反叛嘅佢地，彼此尊重同合作，又如何培訓佢地成為你公司優秀嘅員工？

其實人與人之間，本來存在差異，能否看通這個差異？真係好重要！回到主題，究竟怎樣才是好員工？年代不同，我呢個70後，出黎做嘢快30年，覺得現在跟以前已經變了好多，而未來只有更多嘅變化！我唔希望自己成為落伍嘅老闆，但又唔鍾意妥協，怕失去自己；同時我又好希望員工能盡心盡力工作。我不停反覆思考，我能怎樣面對新世紀，又不失公司核心價值。

我唯有慢慢學習，放下固有觀念。我發現好的員工，會緊張公司情況、在意公司是否有啲嘢行唔通，佢會出聲，如果唔出聲，就會心裏不安。我開始去揾出對公司不滿嘅員工。我發現公司有个率直嘅年輕人，總是開會時投訴公司，愛抱怨。最初，我認為佢似在搞事，心裏有時會唔鍾意佢。有次，提到公司電髮染髮，好似海鮮價一樣沒有固定金額，令客人覺得公司價錢唔夠透明度，也容易產生誤會。（註: 髮型行業一般用藥水種類或份量去衡量價錢，所以價格會出現浮動）如果我只係針對呢個員工，呢番話肯定聽唔入耳，但好奇妙，我嗰刻反思點解佢會咁講，再諗深一層，真係會令客人在幫襯時無安全感，擔心被騙。

經過沉澱，我開始覺得呢個年輕員工講得好有道理，決定將十幾年黎的收費表更新，將價格項目列得更清晰，等顧客可以一目了然。慢慢，公司生意更因此而增加。

所以，我們珍惜反叛又敢言嘅員工，佢可能就係突破公司生意樽頸位的重要一員。